Zaroori Nhi...

 Zaroori nhi…

Zaroori nhi jo Tumhe Dikhata hai,

Woh har bar Sach hi ho.

Zaroori nhi jo Hamesha Khilkhilata hai,

Woh sach mein utna hi Khush ho.

Zaroori nhi jaesa Tasveero mein dikhta hai,

Woh Haqeekat mein bhi waesa hi ho.

Aur jo sabko Motivate karta hai

Kya pata Raaton ko khud hi Rota ho. 

Jo sabki Pareshaniyon ko sunta hai

Kya pata Andar se Woh khud hi Pareshan ho,,

Kya pata Woh ye Batana chahta ho

Lekin Bata hi na Paa raha ho..

Zaroori nhi jisse Woh Pyaar kare

Badle mein Usko utna hi Pyaar mile

Jise dekh kar lage ki Zindagi ho toh aesi

Kya pata Woh Khud hi Sochta ho ki

 Ye Zandagi kyu hai Aesi?

Zaroori nhi Uske kai Dost hai

Toh sab Uski Baaton ko Samjhe

Kya pata Woh hi Baad mein

Khud ko Akela Mehsoos kar raha ho

Woh Bahar se jitna Khamosh Dikh raha hai

Kya pata uske Andar Utna hi shor ho.

Zaroori nhi Woh Khuli Kitaab ki

Tarah Dikh raha hai toh,

Woh waesa hi ho,,

Kya pata Uske Andar kitne Raaz Dabe ho..

Zaroori nhi jaisa Log usse Samajh rahe hai

Woh Haqeeta mein bhi Utna hi Hasmukh ho

Zaroori nhi Woh Waisa hi ho….

Read More

Main Pareshan Hoon...

 

Main Pareshan Hoon…

Pata nhi kya ho raha hai??

Main Pareshan hoon Kayi Dino se,

Main khoya hoon kahi

Apni hi Dhundh mein,

Main “Mujhsa” nhi rehta ho Aaj-Kal,

Main apna Dard Batana chahta hoon,

Par Koi Sunne wala hi nhi hai..

Toh Likh doon kya??

Jo Dard hai Ek Kagaj par.

Shayad Koi Padhne wala hi Mil jae.

Padh kar Baat toh sab samaj hi lete hai,

Shayad Jasbaat samajne wala Koi Mil jae..

Jaante toh Bahut Log hai Mujhe,

Baatien bhi Sabse hoti hai.

Par jo Jaanta tha Mujhe Apne se bhi Jyaada,

Uska Koi Ata-pata hi nhi hai.

Bolne ki Koshish karta hoon Main

Par Koi Sunne wala hi nhi hai.

Yaha Saath Rehkar bhi

Sab Dorr hi Rehte hai..

Mujhe Ehasaas Dilane wala Koi bhi nhi hai.

Main Khud se Baatien karta Rehta hoon

Kabhi-Kabhi khud se Haar kar Soo Jata hoon.

Main Khamosh hoo kuch Dino se,

Par Kisine Notice hi nhi Kiya hai.

Main Text par toh Acche se Baatien Kar Leta hoon…

Par Samne Baat karne se Darta hoon.

Mujhe nhi pata Apne Dard ko Kaise Bayan karte hai??

Isiliye usko Bahar Aane hi nhi Deta hoon.

Bas Kho jata hoon Apni hi Dhun main.

Par Ye Kisi ko Samaj hi nhi aata hai.

Main Khamosh hoo Jaroori nhi ki,

Mujh mein ghamand hai

Bas batane se Darta hoon.

Main bass Waqt ke Saath,

Behta chala Jaa raha hoon..

Aur Zindagi bas Yu hi Chal rahi hai..

Main Pareshan hoon kuch Dino se

Par Koi ye Samaj kyu nhi Paa raha hai??

???

Read More

Kabhi-Kabhi Mann Karta Hai..

 

Kabhi-Kabhi Mann Karta Hai…

 

Kabhi-Kabhi Mann karta hai ki,

Kahin Dorr chala jao..Sab kuch Chhodd kar.

Arsa ho gaya Khud ke saath Waqt Bitaye,

Apne-Aap se milne ka Mann karta hai.

Koi mujhe Samajne Wala hi nhi hai,

Mere Hone-ya-Na Hone se

Kisiko koi Farq hi nhi Padta hai.

Jise jitni Ahamiyat dete hai,

Wo utna hi Dard de jata hai.

Kabhi-Kabhi Hum Thak jate hai,

Pareshaniyo aur Zimmedariyo se,

Zindagi ki is Bhaag-Daud se,

Mann karta hai ki Kahin Dorr Chale jae.

Logo ko Samajna aur Samjana Aab,

Bas ki Baat nhi rahi,

Yaha sab apni hi Baatein kiye jate hai,

Koi Hamari Sunta hi nhi.

Jisko jaisa thik Lagta hai wo Waisa hi karte hai,

Lakh Koshish kar le par koi Samaj hi nhi pata hai.

Main Khud ki Talash mein Nikalna Chahta hoo,

Apne-Aap se Milna Chahta hoo.

Yaha Log Wada karke Todd dete hai,

Khvaab bhi Adhore hi Dikhate hai,

Main Baat karta hoo toh Baat ho jati hai

Par Aage se Koi Pahel hi nhi Karta hai.

Isiliye kahin Dorr Jana hai,

Aur jab tak Mann na Bhare Laut kar nhi Aana hai.

Read More

Kya Yahi Pyaar Hai??

 

Kya Yahi Pyaar hai??

Main kho Chuka hoon,

Kisiki Yaad mein Apne Aap ko,

Kisika Intezaar Rehta hai Aaj-Kal.

Main Khudko Akela Mehsoos kar raha hoon,

Ya Shayad kisiki Kami Khalne lagi hai.

Main toh Thahra hoon apne Is Pal mein hi,

Shayad ye Zameen hi Chalne Lagi hai.

Aaj-Kal Neend bhi Kaam hi aati hai,

Sapne bhi Bas Uske hi Aate hai.

Soone ki Koshish karta hoo main,

Par Uske khayal Mujhe Jaga dete hai.

 

Main kho Chuka hoon,

Kisiki ki Yaad mein Apne Aap ko,

Uska yu Mujhe Dekh kar,

Wo Palkein Jhukana Nazar aata hai.

Main Khudko usme Pane Laga hoon

Mano jaise ki Wo Meri Life ka

 Ek… Dusra Hissa hai.

Aur uske Bina Mano main Adhora hoo.

Aur usko main Apne Aap se bhi,

Jyada Chahne Laga hoon.

 

Uski wo Kajal wali Aankhein Mujhe ,

Unme Dubba deti hai.

Uski wo Lehrati Julfhe Mano,

Mujhe unme Uljah si deti hai.

Uski wo Khamoshi kuch kehna Chahti hai,

Mano wo bhi Mujhe apna Ek Hissa Maanti hai.

Uske aane se Mano Waqt Tham sa Jata hai,

Uske Hassne se Ye Dil kuch Pagal sa ho Jata hai,

Usko Ek Pal Dekhne ko meri Aankhein Taras jati hai,

Wo na Dekhe agar toh ye Duniya,

Kuch Bejaan si Nazar aati hai.

Mujhe nhi pata ki.. Mujhe Kya ho raha hai

Ya kuch Alag hi koi Baat hai??

Kya yahi Pyaar hai??

Kya yahi Pyaar hai??

………….

Read More

Kaise ho Tum? Sab Thik hai Na?

 

Kaise ho Tum? Sab Thik hai na?

Aur kya chal raha hai Aaj Kal Zindagi mein,

Kaise ho Tum? Sab Thik hai Na?

Mujhe toh thik hi dikh rahe ho.

Waise tumhe malum hai? Jaisa Dikhta hai,

Waisa Hamesha sach nhi hota.

Wo School ka Tension abhi tak hai kya?

Aane wale Exam ko lekar Pareshan lag rahe ho

Ye sach hai kya?

Khel-Kood, Yaari-Dosti sab kuch chhodd diya hai kya?

Yehi soch rahe ho na ki..,

Ye Padhai ke chakkar mein sab kuch kyu choott jata hai?

Khelna bhi jaroori hai, Dosti bhi jaroori hai,

Koi ye kyu nhi Batata hai?

Dil Toot`ta hai, Pighalta hai aur baar-baar Roota hai

Par kisi ko ye Ehasaas nhi hone dete ho tum,

Kisi-Na-Kisi Tarah Khud ko Sambhaal Lete ho tum.

Mujhe ye pata hai, Main janta hoon.

Bas kisi ne bol diya ki ‘life is a race’ bhaago..

Zindagi aise hi chalti hai,

Par Jeena toh kisine Sikhaya hi nhi..

Jeetna kaise hai ye toh sab batate hai

Par Haar kar kaise Jeetna hai,

Ye toh kisine Bataya hi nhi..

Lagta hai Aaj-Kal Doston se, Jyada Baat bhi nhi hoti hai..

Arsa ho jata hai Mile par, Ek Mulaqat bhi nhi hoti hai

Tum Akela Mehsoos karte ho Bahut Baar,

Chala gaya na Wo bhi Tumhe Chhodd kar?

Ye main samajh sakta hoon..

Jo Sapne Dekhe the kya Wo Pure ho rahe hai?

Ya Kho gae Wo bhi kahi Purani Yaadon mein?

Tum thik Dikhte ho, Par ho Kya?

Kitna kuch Chal raha hai Mann mein Bata Paoge kya?

Kabhi-Kabhi Tum bhi Shaant Ho Jate ho kya?

Jo Sawaal hai Mann mein Unke Jawaab Dhundh lete ho kya?

Apni Zimmedariyon ke lie,

Kabhi apne Khwaab Na chhodne pade.

Iska Darr Hamesha Rehta hai na?

Rozz ke Taano se Tang Aa Gae ho na?

Duniya kya Kahegi? Log kya Sochenge?

Bas issi mein hi Ulajh kar reh gae ho na?

Batao na kaise ho Tum, Sab Thik hai na?

Raat mein Neendein kamm Aane lagi hai na?

Zimmedariya Bistar se Jaldi Uthane Lagi hai na?

Mujhe Sab pata hai, main Samajh Sakta hoon.

Abb ye Zindagi jaesi bhi hai Tumhari hi toh hai.

Apne Aap ko kam nhi Samajhna Chahiye

Uljhe ho Tum Sulajh jaoge

Ek din zindagi ko bhi samajh jaoge.

Toh tum bhi samajh lo isse

Haar aur jeet se koi farkk nhi padta,

Farkk padta hai ki tumne kya sikha isse.

Zindagi muskurane ka naam hai.

Zindagi har pal me jeene ka naam hai.

………….

Main phir se pouchta hu ‘kya tum thik ho?

Read More

Chai.....

Chai…

Hui khatam kisise Baat ho,

Ya mil jae koi Ajnabi,

Aur Dosti ki Shuruaat ho.

Ya Dil kabhi jo roo pade,

Ya Khil-khilata Mann ho.

Har Waqt yaadgaar hota hai,

Wo Waqt sirf-aur-sirf mera hota hai,

Aur Khubsurat lagti hai ye Zalim Duniya bhi,

Jab ek Cup Chai ka sahara hota hai..

Jab bin Mausam Barsaat ho

Ya Garmi ki wo Shaam ho,

Doston ki wo Mehfil ho

Ya Ghar me koi Tyauhaar ho,

Chahe December ho ya June ho

Chai har Mausam mein Sukun hai.

Chahe 5 star Hotel ho ya Raste ki wo Choti si Dukan

Har Mauke ki Noor hoti hai,

Ye Chai har Mauke par jaroor hoti hai.

Subha ke Akhbaar ki ye Saathi hoti hai

Dhalte Suraj ki ye Laali hoti hai

2 Ashiquko ke lie ye Muhabbat ki Nishani hoti hai,

Bhatakte Mushafir ke thakam ka ye Sahara hoti hai

Mehmano ke aage ki ye Shaan hoti hai,

Ye Chai hai janaab har Pal Mein Khass hoti hai

Din ka Aagaj aur Khatm isi ke saath hota hai

Jahan do Dost baith jai saath mein bas,

Iska hi Intezaar hota hai

Iske Jaayake ke saath Yaadein kuch Taza ho jati hai

Ye Chai hi hai jo nai yaade Bakher jati hai

Thakan ke waqt ye Sahara ban kar aati hai

Ek Cup Chai saari Thakan meta kar chali jaati hai.

Mohabbat karne walo ke lie,

Wo Adrak wali Chai,

Shaam ko Baithe wo Masale wali Chai,

Doston ki masti mein wo Tapri wali Chai,

Wo Kulhad ki Mahek mein Ghulti Chai..

Chai zindagi hai mere Dost,

Chahe wo Subah ki ho ya Shaam ki

Chai ki ek Chuski Sukoon le aati hai.

Chai Ishq hai chai Pyaar hai

Iske aage sab Bekaar hai

Chai Nasha hai chai Maza hai

Chai Mithi si koi Saja hai

Doston ke saath Chai ka Rishta hum Hak se Nibhate hai

Are hum toh Chai bhi Dil se banate hai

Toh kisi Din Milte hai Chai par...

Doston ke Saath Mulakat

    Ek Cup Chai ke Saath.....

Read More

Bachpan

 

Bachpan..

Bachpan ki wo ameeri jane kaha chali gai,

Jab paani me hamare bhi jahaaj chala karte the

Aur hawa mein hawai-jahaaj bhi hamare hua karte the

Mitti ka hi sahi, par Mehal hamare bhi hua karte the.

Na kamaane ki Fikr, Na Zamaane ka dukh

Bas khushiyon se bhari Zindagi thi,

Aaj Zimmedaariyan hai, Tab khilkaariyan hua karti thi

Aaj Jaroorten hai, Tab khvaahishen hua karti thi.

9 baje Pokemon aur 9:30 baje Beyblade tha

Hero mein Shaktiman hi apna favourite tha

Wo Hatim ke 7 sawaal ka pura karna,

Aur Vikram ka Gabrool se wo sone ke sikke lekar

Kahani sunana ek alag hi maza hua karta tha.

Jisska Bat pheli uski batting, Aur out hua toh

Ammi bola rahi hai ye hi bahana hota tha.

Tab din pakdam-pakdai, gilli-dandda se shoru hota tha

Aur chor-police, chupam-chupai pe Khatam.

Maidan me khelne ki jagah nhi hua karti thi

Jo jeeta wo hi khelega phele bs ye hi sarth hua karti thi.

Wo cycle ke tire ko apni gaadi maan lena

Aur phir doste ke saath race lagana,

Kanche, Lagori, lattu, jab har ek khel mein maza tha.

Tab Pubg nhi tha yaar, wo contra ka zamaana hua karta tha.

Tab ye pepsi, coca-cola aur sprite nhi yarr

Wo kanche wali Banta ka zamaana hua karta tha.

ShakLaka Boom Boom wali pencil ko pana,

Hamari chahat hua karti thi

Tab Zindagi bahut hi Simple aur Haseen hua karti thi.

Bina degree ke Doctor ban jate the

Aur dawai ke naam par chote-chote patthar dete the.

Wo choti choti baat par doston se laddna-jhagadna

Tujhse kabhi baat nhi karunga bolkar,

Sham ko ussi ke pass jakar baith jana.

Ek pal mein masti aur dusre hi pal masoom ho jate the

Malik the apni Marzi ke har pal mein khush rehte the.

Tab lagta tha ki ye filmo me actors

Gaana khud hi gaate hai,

Aur har baar inke kapde kaise badal jaate hai.

Roo Rookar school jate aur chutte waqt,

Sabke haath mein O-YES hota tha

250 cards jama hone par bas,

Watch milne ka intezaar rehta tha

Wo sachi muskurahat hothon par,

Aab kaha dekhne milti hai

Muskurahat, Tabassum, Hassi, khilkaariyan sab kuch

Naa jane kaha kho gai.

Dekhte hi dekhte pata nhi hum kab bade ho gae.

Chahat Chand ko pane ki thi

Aur manzil ki koi khabar na thi.

Aaj ke din naa jane kaise gujar rahe hai

Main shukr-gujaar hoo ki mere Bachpan ke din

Bachpan jaise gujre hai..

Read More

Zindagi

 Zindagi...

 

Zindagi ek uljhi si paheli hai,

Dard aur gam toh mano iski saheli hai.

Saat aksharo ka shabd hai tu,

Par hazaron hai tere naam, ZINDAGI.

Na jaane kyu darbadar ho rahi hai aaj Zindagi.

 Khushiyan or gam jahan se behte hai waqt-waqt par,

Wo sukha pada Nal hai tu,

Bina ticket ke jo kabhi kiya tha, wo safar hai tu

Jin raaston par chal kar bhatak jane ko karta hai mann,

Wo Anjaan Dagar hai tu.

Jo dekhe the mene Aankhon mein sapne,

Wo chamakta sahar hai tu.

Shayad jo khai thi Maa ke haath ki,

Wo Sokhi Roti or Achaar hai tu.

Ya jo padi thi teacher se,

Wo pyaar bhari dande ki maar hai tu,

Gira kar jisne chalna sikhaya,

Khud rula kar jisne hasna sikhaya,

Wo bhetareen ustad hai tu.

Jisne samajh liya tujhe uske lie,

khushiyon se mehka bagaan  hai tu,

 

Aur jo ulajh kar reh gaya tujhme,

Uske lie simta hua ek kabristan hai tu.

Jo guzar gaya wo bita kal hai tu,

Jo chal raha wo behta ek pal hai tu.

Ek pal mein andhera ek pal mein jo ujala kar jae,

Aesi jadugar hai tu.

Zindagi Ae zindagi tere safar par jo chala,

Usne mud kar dekha nhi.

Aur jo tera na ho saka wo khud ka bhi nhi.

                                 Mohd Anas Ansari

Read More

Saal tere badle rango se....

Saal tere badle rango se..... 

        2020 is saal mein jo jo hua hai wo koi nhi bhul sakta hai. is saal mein koi musibate aai hai. Jahan is saal ne hame har baar musibat mein dala hai wahi kahin na kahin hame kuch na kuch sikhaya hai. Jahan kai parivaar saath mein nhi rehte the, is saal mein sabne saath baith kar 3 waqt ka khana khaya hai. Toh aaj 2020 ke lie...

Khamoshi odh kar sannate ne shor machaya hai

Khuda ne dekho ye kaisa manjar dikhaya hai

Kahin lagi Aag kahin aaya Toofan

Kahin giri Bijli kahin fata Baadal

Har taraf laga Lasho ka Ambar

Kahin Baadh mein sab Barbad hua

Dekhte-hi-dekhte Sansaar ka vinaash hua

Basti ujad gai kisi ki, Sahar ka sahar barbaad hao

Assmaan mein chai thi badli

Kidon ka jo hamla hua

Ek tofaan aisa aaya jo duniya hi ujaad gaya

Dharti fisal gai paron tale

Dar-ba-Dar Sansaar hua

Kai chirag bujhe aangan ke

Khushiya bhi kai barbaad hui

yu ulti ghumi Zindagi

Ki sari Duniya hi tabaah hui

Ek saal mein maano janmo ka nuksaan hua

Zindagi mein zindagi ka jeena hi muhaal hua

Zindagi mein Zindagi ka jeena hi muhaal hua.....

Yu to khub rulaya tune

Har baar hi sataya tune

Kaha nhi bhatkaya tune

Par khush hoon...

Khush hoon isi bahane mene

Gir kar bhi jeena sikh liya

Saal, tere badle rango se 

Mene jeena sikh liya

Saath mere doctor aur javaan bhi the

Na dekhi dharm aur jaat

Sabke khatir bhid gae khud hi

Aakhir vo insaan hi the

Apni akad bhula kar Sabne

Thoda jhukna sikh liya

Saal, tere badle rango se

Mene har pal mein rehna sikh liya

Jab muskhil mein sansaar sara tha

Toofano ka dar par pehra tha

Hamare sapno ko pura karna tha

Tab milkar himmat kari sabne

Humne milkar udna sikh liya

Saal, tere badle rango se

Har pal mein udna sikh liya

Saal, tere badle rango se

Mene jeena sikh liya

Mene jeena sikh liya...

                                                            Alvida 2020

               Main Dua karta ho ki 2021 mein aapke chere ki ye muskorahat kabhi na jae, aap hamesha khush raho, aapki har nek Dua kabool ho aur aap hamesha fit n fine rahe..............Ameen

Aap sabhi ko meri taraf se nae saal ki bahut bahut Mubarak baad

Read More